Shopping魔帶您去博洛尼亞 之 起程喇~

24/12/2015 | by shopping 魔 | In 美食

今次受阿聯酋航空及博洛尼亞旅遊局邀請,Shopping魔親身飛去意大利為大家直擊報導! 博洛尼亞係阿聯酋航空最新航點,除左有自己嘅景點同特色之外,地理位置仲非常有利。喺意大 利中心,1至2個鐘內已經可以去到米蘭、威尼斯同佛羅倫斯,而且酒店價格亦比其他旅遊大城市更加相宜,作為過夜據點就最適合。唔講咁多,即刻睇下我今日去左邊先!

IMG 0173

Shopping魔去長途旅行最鍾意搭零晨機,因為可以慳返一晚酒店,仲一覺瞓天光 就到,唔覺已經搭左成日飛機丫嘛。未上機唔知做咩好?我幫你實地考察過阿聯酋航空嘅貴賓室,唔單止有好多食物揀,仲有超多美酒,包括白蘭地、威士忌同啤酒等等,俾多幾個選擇你嘛。

IMG 0716

Shopping魔今次有幸坐Business Class 堅離地!阿聯酋航空A380個商務艙夠晒豪華就係人都知。飛機比起有自己嘅mini bar 又有平躺座椅,望住天花板d星星燈,話咁快就瞓著,食埋早餐就到杜拜。今次喺杜拜有3個鐘左右嘅時間,個機場好大,大到阿聯酋航空要用專用嘅客運大樓,所以雖然去到係零晨時份,都仍然非常熱鬧。行行下唔覺唔覺就夠鐘轉機去博洛尼亞啦!

IMG 0717

一去到就見到博洛尼亞旅遊局Bologna Welcome嘅機場分部,旁邊就係租車公司嘅櫃位,想自駕遊嘅話真係超級分便!不過Shopping魔今次要跟大隊,搭專車,yeah!

IMG 0177

機場離市中心都好近,大約3個未車程就到酒店。放低行李就出去搵食!行出大街,入左一間唔起眼嘅cafe嗌左個薄餅同朱古力。嘩嘩嘩!又平又好味,個薄餅只係4歐羅,個朱古力更加係不得了!我從來未飲過咁傑達達得黎又滑,濃得黎又唔太甜嘅朱古力架!唉講你都唔會明我當時有幾震驚架喇,你都係自己嚟試啦。

Essse Caffè
地址: 30 Via dell'Indipendenza, Bologna

IMG 0456

食完就周圍亂行。意大利有一樣野令哀家非常羨慕,就係發展同保育之間互相平衡,和諧共存。有時候唔係話發展就可以放棄一啲被認為冇生產價值嘅事物。一路穿梭博洛尼亞嘅街度,發現好多店鋪仍然沿用幾百年來嘅店面。Shopping魔認為咁樣一啲都唔會過時,仲覺得好享受呢視覺效果添!

IMG 0461

Shopping魔好鍾意行街市,去到全世界都必須要行,例如博洛尼亞乜乜乜。點解呢?如果想體驗當地人生活,知道當地人先會買嘅嘢食嘅嘢,街市一定搵得到,而且係以平民價錢就搞得掂。幾百種讀唔出名嘅意粉,幾百種唔知有咩分別嘅火腿,幾百種見都未見過嘅蔬果,一一喺Via Drapperie呢度搵到。

IMG 0175

今日冇乜安排節目,最啱就係隨心所欲行到邊影到邊。其實最美麗嘅風景唔使特別去追求,因為佢根本就隨時喺你身邊出現!Magic hour嘅天色,亮起聖誕燈飾嘅街道,抬頭就見得到。

 IMG 0178

除左風景,Shopping魔去shopping都見到唔少正野!呢間糖果鋪,賣好多我見都未見過嘅甜點,種類數之不盡咁多,藏量多到要擔梯先攞到上層嘅存貨架!我都唔執輸,買左幾盒糖,就算唔食得,都睇得丫!

Antica Drogheria Della Pioggia
地址: Via Galliera, 27, 40121 Bologna, Italy
電話:+39 051 223754

IMG 0681

呢度嘅鋪頭都比較早收,基本上7點就開始陸續關門,8點就已經冇野買。不過經過大街同聖誕市集,又幾靚嘅~

IMG 0179

係呀我又食野喇。講個小知識過你聽,知唔個點解肉醬意粉英文係Speghetti Bolognese? 冇錯!就係因為佢係來自Bologna博洛尼亞喇!今晚當然要即刻啪返幾碟啦!好啦過左漫長嘅一日之後,累了要休息,早抖啦!

嗚謝: 阿聯酋航空 Welcome Bologna

 

封存的帖子
Disclaimer:

本網站可能包含網頁使用者、廣告客戶、聯名商戶、夥伴或其他第三者所張貼之資訊內容,而該等內容未經Zuji 審閱或修訂。Zuji對因以上人士張貼之資訊內容所帶來之損失或損害概不負責。

This website may contain contents posted or submitted by users, advertisers, joint merchants, partners or third parties. Such contents are not read, verified or edited by ZUJI before they are published. ZUJI shall not be held liable for any loss or damages arising out of the publication of such contents.

Scroll To Top