Shopping魔帶您去博洛尼亞 之 博洛尼亞一日遊

28/12/2015 | by shopping 魔

Cover2

睇嚟Shopping魔喺阿聯酋航空嘅飛機上瞓得太爽,竟然6點幾就醒左!望吓窗外咁靚嘅黎明境色,丫都唔係咁差啫~ Check吓email碌吓Facebook就天光喇,今日行程緊密早啲落去食!早!餐!

IMG 0445

入住嘅呢間酒店有提供自助早餐,都幾多野食架,呢樣攞啲嗰樣又試啲,未試晒就飽晒,咁哀家有氣有力影好多靚相俾你睇啦,係咪好開心先?

UNA Hotel Bologna
地址: Viale Pietro Pietramellara, 41, 40121 Bologna, 意大利
電話:+39 051 60801
每晚:$684起

IMG 0453

今日嘅行程係博洛尼亞一日遊,由酒店行去市中心嘅Piazza Maggiore廣場都係15分鐘左右, 嗰度係博洛尼亞旅遊局Bologna Welcome嘅總部。因為博洛尼亞仲未係一個好熱門嘅旅遊點, 無論旅遊書定網頁都未必有好多資料搵得到,但喺呢個位置咁方便嘅旅客中心,除左可以搵到好多當地嘅資訊、活動資料,仲可以搵到當地手信同埋報烹飪班添!

Bologna Welcome
地址: Piazza Maggiore, 1, Bologna
電話:+39 051 239660

IMG 0454

沿住廣場有好多宮殿,雖然依家已經冇皇室喺入面住,但係佢地仍然扮演緊好重要嘅角色。每年都有好多團體會租用宮殿做展覽、音樂會場地,甚至舉辦婚禮都有得傾,但首先,你要有個...

廣場另一邊仲有呢個城市最大嘅天主教堂Basilica di San Petronio 但係你會見到佢其實係未完成,屋頂啲紅磚外露,冇用到雲石裝飾。其實佢原先個設計並唔係咁樣,當年當地教區向教庭申請撥款起呢個教堂嘅時候,教庭見到呢個咁進取嘅申請之後,以不得超越羅馬聖彼得大教堂為由,只係批唔足夠完成整個工程嘅預算俾Basilica di San Petronio 所以cut埋左、右翼個設計,都唔夠錢做外牆裝飾,拿拿臨封左個天花版就算。

除左特別嘅外貌,Basilica di San Petronio入面仲有一個充分顯示古人智慧嘅物品-子午線。古時係用日光嘅軌跡嚟計時,到依家都仲work架。

IMG 0455

博洛尼亞其中一個最主要嘅命脈就係大學。全球最古老嘅大學,建於公元1088年的博洛尼亞大學,出過好多偉人校友。呢個校舍雖然不至於有1千年,但都已經存在咗幾百年。牆上仲掛住當年博士班代表嘅名、學科同國籍,認真巴閉。

IMG 0457

12月,歐洲到處都住係Christmas Market 行行吓又見到一個。今年呢個位於Piazza Minghetti嘅聖誕市集主題係法國,所以賣嘅都係法國特產,例如有普羅旺斯嘅薰衣草、香皂,同埋令Shopping魔超興奮嘅Fine de Claire 呢度嘅蠔即開即食,半打細嘅都只係10歐元,大約係香港嘅一半價錢咋!因為夠新鮮,檸檬汁加上入面嘅海水已經係最好嘅調味,再配埋一杯香檳,簡直係一大享受。

 IMG 0458

嚟到呢個三角型嘅廣場,前面就係Santo Stefano 呢個修道院群由7個宗教建築群相連而成, 歷史非常悠久,最早喺5世紀已經出現。為咗迎接聖誕節,有藝術家仲準備左好多雕像,將一個禮堂佈置到非常有氣氛添!

IMG 0460

行咗成朝,係時候醫醫肚。Shopping魔好鍾意Eataly呢個餐廳名。佢位於Ambasiatori書店嘅裏面,餐廳行簡約現代風,食物質素絕對唔遜色!主菜係博洛尼亞特產tortellini意大利雲吞。平時香港食到嘅意大利雲吞,通常都係配忌廉汁或者茄汁,但係當地人其實係放雞湯食,唔夠味就加啲芝士粉,所以唔會太漏,嚟到博洛尼亞一定要試呀!

Eataly
地址: Via degli Orefici, 19, 40124 Bologna
電話:+39 051 095 2820

IMG 0464

其實博洛尼亞城區有好多棟石塔,當年石塔除咗軍事用途之外,亦代表擁有嘅家族嘅權力同財富。今日參觀嘅呢座Prendiparte Tower係市內第二高嘅塔。主人Matteo先生非常親切,親自帶領參觀同講解。

IMG 0465

Prendiparte Tower今時今日已經改裝成B&B 沿旋轉樓梯行上去就黎到一個客廳,向上望就見到睡房。住慣酒店嘅你,又有冇諗過感受一吓住喺城塔嘅滋味呢?

IMG 0466

再上層嘅係廚房同飯廳。餐枱、餐椅非常精緻,Matteo解釋套傢私係佢曾祖父母收到嘅結婚禮物,已經超過100年歷史喇!有需要嘅話,民宿仲可以安排廚師準備當地特色美食添架。

IMG 0467

再上一層曾經係一個監獄,佢無自由,佢失自由,所以喺牆上面刻寫打發時間。到底渡過左幾多個晝夜,唯有以刻度計算。心入面嘅想法冇辦法傾訴,亦只好靠繪畫嚟抒發。

IMG 0679

由於石塔有成12層高,底部嘅牆要比較厚先可以支撐起整座結構,越高樓層,牆身會越薄, 建築材料亦都越輕。石梯變成木梯,而且非常斜,上落都幾吃力。不過爬到最上層,可以見到博洛尼亞市全景,覺得一切都值得。

想參觀,除咗入住民宿之外,仲可以參加由Bologna Welcome逄星期五、六舉辦嘅行程,只需付出15歐元就可以遊走古城兼上塔頂觀光,比留宿真係抵好多架!

詳情可以睇Bologna Welcome網頁

Torre Prendiparte
地址: Piazzetta Prendiparte, 5, Bologna
電話:+39 051 589023

IMG 0680

Shopping魔就梗係要去shopping 名店林立嘅Galleria Cavour亦喺Piazza Maggiore廣場周邊,由歷史建築改建而成。除左保留外牆,個別店鋪裏面都仍然保留巴洛克風格嘅裝飾同繪畫。LV Miu Miu Hermès等國際名牌應有盡有,最最重要嘅係,呢度有冷暖氣有瓦遮頭之外,係唔使排隊同人迫!君不見香榭麗舍大道名店門外大排長龍兼且日曬雨淋、老佛爺人潮好比崇光感謝周,而呢度!可以舒舒服服咁慢慢行慢慢揀,售貨員亦好好招呼,冇得輸呀!

除咗大家都熟悉嘅國際名牌之外,另一個驚喜係竟然俾哀家搵到博洛尼亞球隊嘅專門店,個別上季波衫仲有半價,球迷一定唔可以錯過!血拼中途需要冷靜吓?二樓有一個畫廊開放,除左失欣賞畫展、相展之外,仲可以坐低休息一下架。

Galleria Cavour
地址:1/V, 40124 Bologna
電話:+39 335 640 8240

IMG 0682

終於行到返酒店,今日仍然係Bolognaise 不過配第二隻意粉。之後仲有炸豬扒同Mascapone做甜品,嗯...重口味者可以一試。

食完甜品我正式冇晒電,係咁早抖~

嗚謝: 阿聯酋航空 Welcome Bologna

封存的帖子
Disclaimer:

本網站可能包含網頁使用者、廣告客戶、聯名商戶、夥伴或其他第三者所張貼之資訊內容,而該等內容未經Zuji 審閱或修訂。Zuji對因以上人士張貼之資訊內容所帶來之損失或損害概不負責。

This website may contain contents posted or submitted by users, advertisers, joint merchants, partners or third parties. Such contents are not read, verified or edited by ZUJI before they are published. ZUJI shall not be held liable for any loss or damages arising out of the publication of such contents.

Scroll To Top