Shopping魔帶您去博洛尼亞 之 其實今日去拉文納

04/01/2016 | by shopping 魔

01

原來尋日放晴係好好彩,跟住落黎幾日都非常大霧,又別有一番風味啵。咁遠水路嚟到意大利,冇理由剩係去一個城市家嘛,今日一於衝出博洛尼亞,嚟到馬賽克之都拉立納Ravenna。雖然只係相距大約一個鐘車程,但係感覺已經好唔同啦!拉立納唔大,靠雙腳已經可以好好咁遊覽呢個地方嚕。

 

 02

Domus dei Tappeti di Pietra 有一個平凡嘅天主教堂外表,但內裏原來好堅!1993年,當年一個地底工程,意外發現埋藏喺地底、有千幾年歷史嘅古宅遺址。古宅嘅主人相信有相當地位同財富,因為間屋除咗面積大之外,仲以馬賽克裝飾每一個房間嘅地板,設計精美細緻,而採用嘅材料亦都幾名貴,喺其中一啲作品上更加發現金石添!

 

Domus dei Tappeti di Pietra
地址: via Barbiani, Ravenna
電話:+39 0544 32512

 

03

唔知係咪就係因為千幾年前Ravenna已經好流行馬賽克,成個城鎮到處都見到呢種手藝,而且仲有專門學校教授,令到傳統得以傳承落去,發揚光大。呢間小店入面除咗有賣馬賽克精品之外,亦都有材料出售,等你可以顯露才華。手腳唔太聽使嘅話亦可以直接買成品返去,你會肯肯定啲作品係意大利全人手製作,因為師傅就喺店入面即場整俾你睇,剩係made in Italy呢樣嘢已經值回票價啦!


Annafiett
地址: via giuliano argentario, 21, 48121 Ravenna
電話:+39 0544 213728

 

04

店舖旁邊就係充滿拜占庭風格嘅聖維塔教堂,有接近1,500年歷史,亦都由非常精緻嘅馬賽克裝飾得美輪美奐。馬賽克鑲嵌出一幅幅聖經故事壁畫,想知道箇中嘅典故,可以利用設喺祭台旁邊嘅自動解說機,透過聽筒了解更多。

 

你問我咩係拜占庭?乜你冇玩過AOE咩肉腳?

 

Basilica di San Vitale
地址: Via San Vitale, Ravenna RA
電話: +39 0544 541688

 

05

聖維塔教堂後面就係被列入世界遺產之一嘅加拉·普拉西提阿陵墓。叫得陵墓,冇返幾副石棺邊似樣呀。咁點解一個陵墓都可以成為景點?因為裏面安葬嘅係羅馬帝國皇室,並且以最靚嘅拜占庭風格馬賽克佈置,顏色依舊艷麗,絕不過時。Shopping魔喺當地見過一啲以呢度嘅馬賽克圖案印刷而成嘅飾物,既然大家都百無禁忌,咁就冇咩好怕啦~

 

Mausoleo di Galla Placidia
地址: Via Giuliano Argentario, 22, 48110 Ravenna RA
電話: +39 0544 541688

 

06

唔知有冇人都好似Shopping魔咁,有人群恐懼症,唔太enjoy人多嘅旅遊景點,好鍾意跑去啲有特色又冇乜人會去嘅小鎮?Ravenna絕對滿足到我呢個要求,呢度有密集嘅UNESCO 世界遺產,但又唔會人頭湧湧。由一個景點行去另一個景點完全可以欣賞到意大利人嘅美學,就連每個街道嘅路牌都塊塊唔同架!

 

07

叫得馬賽克之都,當然要有返個馬賽克博物館啦。呢個當代馬賽克博物館真係令我大開眼界,即係好似上圖咁,你睇中間張相,離遠望你會以為嗰碌係乾草堆,但原來近睇先發現佢係一個大型馬賽克藝術。呢個馬賽克草堆完全打破咗既有嘅定律,其實馬賽克都唔一定係平面上面架!

 

08

呢啲就係Shopping魔最鍾意嘅作品。原來馬賽克都唔一定係色彩繽紛,都唔一定係石仔玻璃,都唔一定要係平面。馬賽克可以係喺立體嘅物件上表現,可以堆砌出抽象畫,可以由大量唔同嘅紙仔交錯而成,可以用唔同嘅物料嚟製作。

 

想行藝術館扮文青,呢度係一個唔錯嘅選擇。

 

Mar - Museo D'Arte della Città di Ravenna
地址: Via di Roma, 13, 48100 Ravenna RA
電話:+39 0544 482477

 

09

離開Ravenna之後就起程返去博洛尼亞。途中經過一個令Shopping魔異常興奮嘅景點,就係Gelato大學!咩話?雪糕都有得大學?其實要做到一杯好雪糕都好有學問架!

 

正所謂未見官先打三百大板,未整雪糕先整三大啖,見到雪櫃入面嘅Gelato即刻試返幾隻口味先!

 

試完味就要自己學整喇,好玩啊好玩啊!其實Shopping魔自小有個志願,就係做雪糕口味研發,等我日日都可以狂食雪糕,好開心今次算係可以一嘗呢個小心願。

 

10

落手做之前有一小節理論課,解釋工廠式製作嘅Ice-cream同手工製作嘅新鮮Gelato有咩分別。除咗甜度、口感唔同之外,原來Ice-cream係打咗大量空氣入去,比例可以高達一半,唔怪之食完好似冇食過,成陣風咁啦!

 

雖然依家科技發達,用機器可以整到高水準,質素穩定嘅Gelato,但係喺呢度就可以試吓完全人手製作,Shopping魔在此公開秘方:半斤黃猄、半斤北芪、半斤田七、半斤蘋果、半斤橙,兩碗水煲埋半桶水,唔好飲,倒咗佢,就完成架喇!係咪好簡單呢?

 

11

叫得大學又點會得一間雪糕店咁少呢?呢度真係有舉辦唔同嘅課程,由學整雪糕至管理店舖都有得學,每年都吸引到世界各地嘅學徒嚟取經,成為專業嘅雪糕大師。

 

喺校園嘅地下亦設有一個雪糕博物館,介紹雪糕發展嘅歷史,展出唔同時代嘅雪糕機同攤檔。另外亦有商店出售雪糕機、雪糕書,同埋一啲好可愛嘅雪糕小飾物添~

 

Carpigiani Gelato University
地址: Via Emilia, 45, 40011 Anzola dell'Emilia BO
電話:+39 051 650 5111

 

12

 

食咗幾日西餐,唔係話唔好食呀,但係都會掛住暖笠笠嘅唐餐,所以今日晚餐去咗酒店旁邊嘅中餐館開飯。嗚呀~宮保雞丁~麻婆豆腐~糖醋骨~酸辣湯~我唔客氣喇!

 

Ristorante Cinese Citta d'Oro 金城飯店
地址: Viale Pietro Pietramellara, 39, 40121 Bologna
電話:+39 051 241794



嗚謝:阿聯酋航空,Welcome Bologna 

封存的帖子
Disclaimer:

本網站可能包含網頁使用者、廣告客戶、聯名商戶、夥伴或其他第三者所張貼之資訊內容,而該等內容未經Zuji 審閱或修訂。Zuji對因以上人士張貼之資訊內容所帶來之損失或損害概不負責。

This website may contain contents posted or submitted by users, advertisers, joint merchants, partners or third parties. Such contents are not read, verified or edited by ZUJI before they are published. ZUJI shall not be held liable for any loss or damages arising out of the publication of such contents.

Scroll To Top