最傳統的泰風味 - 清邁

22/07/2016 | by 一支箭

曼谷同布吉大家都唔會陌生,貪佢夠近,機票平又多野玩,一支箭就第一次嚟到清邁。但打從一落機就覺得呢度同曼谷好唔同,點解咁鄉下嘅?不過,一支箭對於古樸嘅地方係最鐘情,今次一定會有一個愉快嘅旅程!

喺清邁,相比曼谷同布吉呢啲旅遊熱點,當地人嘅英語水平相對較低,想向途人問路都有一定困難;加上交通嘅問題,想玩多啲嘅不如參加Local Tour啦!而又想揀間有質素又實惠嘅旅行代理,首推位於東門(Tha Pae Gate)比利叔叔旅行社(Billy Tours)[地址:97 Moonmuang Road, T.Sripoom Muang, Chiang Mai, 053-418254]

呢度有超多行程,而最受歡迎嘅有3個:

  1. 清萊白廟+長頸族+金三角一天團(1,100฿):呢個團約07:00左右就會去酒店接您(記住護照隨身),約21:00先返抵酒店。行程超級豐富,第一站就先去溫泉,由於溫泉區設於路邊,所以一般都係浸吓腳仔就算,如果未食早餐,不妨買隻溫泉蛋試試,都唔錯架!

第二站就會去清萊白廟,聽導遊講,白廟嘅建築係以天堂為主題,沿路入去白廟(天堂),您會見到有好多來自地獄嘅骷髏骨,以提醒世人要做好事。呢個建築物到依家仲未全部完成,不過已經獲得全世界第二靚嘅廟宇稱號。

午餐前會安排大家去拜訪長頸族,喺呢度可以買到好多長頸族精品,仲可以同長頸族影相留念添。

至於午餐係自助式為主,質素就麻麻喇,始終團體餐要求唔可以太高;食飽飽就正式開展金三角嘅行程,首站先去寮國嘅木棉島,而嚟呢個地方可做落地簽証(30฿),島上以行街買嘢為主,叫做可以窺探一下神秘嘅寮國國度



行程最後一站會嚟到泰緬邊境城市 - 美塞,呢個城市同深圳差唔多,咩叫差唔多?就係買A貨喇!由於時間關系,行程唔會進入緬甸國境,睇完美塞,行程就正式完結。因為行程冇包晚餐,一支箭提議大家可帶定啲乾糧出發,以備不時之需!另外,有個別旅行社收費較平,但就冇包景點門飛,到時每項再畀,計落仲貴,所以一定要問清問楚呀;

 

  1. 泰菜一天班(900฿):其實有另一個半天行程(500฿),分別係少咗街市買餸同煮少一個餸,視乎您時間上嘅安排啦!而一支箭就揀咗冬陰功、紅咖喱雞、泰式濕炒河、木瓜沙律、椰汁黑糯米(您可以自由選擇),課堂以英文教授為主,煮完仲可以試番自己嘅廚藝添!一支箭煮得都唔錯,仲俾老師讚添!煮完仲有張證書俾番您(半天團係冇嘅),呢個行程超好玩,一支箭首推,仲可以攞番本食譜返屋企煮俾心愛的人食呢;

 

  1. 素貼山雙龍寺+皇宮半天團(500฿):除非你真係好驚盪失路,否則自己搵車去仲抵。喺北門(Chang Phueak Gate)有督督上素貼山,每位60฿,坐滿12人就開車。提提您,沿路行去北門,會有好多督督司機勸您包車,但價錢相對較貴,一支箭就唔建議各位咁樣上山喇(除非您有10人或以上,可講價)。上到山,如果天朗氣清,喺雙龍寺仲可以睇到清邁全景。至於時間夠仲可以坐督督去皇宮同睇櫻花,或去睇睇文藝味十足嘅清邁大學同動物園,自組一個適合您嘅行程啦!

另外,仲有大象班、激流同叢林飛翔等等行程,如果報多幾個行程,記住同比利叔叔講價

除此以外,清邁仲有3個夜市,分別係長康夜市、週六夜市同週日夜市:長康夜市每日都開,但相對較貴,如果時間唔多可以放棄;週六夜市位於東南門(Chiang Mai Gate)外,而週日夜市位於古城區內,兩個夜市賣嘅野差唔多,價錢都係超抵,一支箭買到超重咁返嚟!哈哈!

 

總括嚟講,清邁之行一定唔會令您失望,整體消費指數比曼谷布吉仲低,您一定會滿載而歸。

封存的帖子
Disclaimer:

本網站可能包含網頁使用者、廣告客戶、聯名商戶、夥伴或其他第三者所張貼之資訊內容,而該等內容未經Zuji 審閱或修訂。Zuji對因以上人士張貼之資訊內容所帶來之損失或損害概不負責。

This website may contain contents posted or submitted by users, advertisers, joint merchants, partners or third parties. Such contents are not read, verified or edited by ZUJI before they are published. ZUJI shall not be held liable for any loss or damages arising out of the publication of such contents.

Scroll To Top